ShriHari Mandir Now Reopening For All Devotees

૨૧મી જૂનથી નિર્જળા એકાદશીના પાવન દિવસે શ્રીહરિ મંદિર દર્શનાર્થીઓ માટે ફરીથી ખૂલશે

પોરબંદરમાં પૂજ્ય ભાઈશ્રી દ્વારા સંસ્થાપિત શ્રી સાંદીપનિ વિદ્યાનિકેતનમાં આવેલ શ્રીહરિમંદિર તા.૨૧/૦૬/૨૦૨૧, સોમવારના રોજ નિર્જળા એકાદશીના પાવન દિવસે દર્શનાર્થીઓ માટે ખુલી રહ્યું છે. કોવિડ૧૯ના સમયમાં દરેક દર્શનાર્થીઓને સાવધાની રાખીને અને નિયમનું પાલન કરીને શ્રીહરિમંદિર આવવાનું જણાવવામાં આવે છે.

કોવિડ-૧૯ની મહામારીની બીજી લહેરને કારણે ગત એપ્રિલ મહિનામાં શ્રીહરિ મંદિરના ટ્રસ્ટીઓ દ્વારા દર્શનાર્થીઓ માટે શ્રીહરિ મંદિર બંધ કરવાનો નિર્ણય કરવામાં આવ્યો હતો. પરંતુ વર્તમાન સમયમાં કોવિડ-૧૯ના કેસોમાં રાહત થતાં અને સરકારશ્રી દ્વારા પણ કોવિડ ગાઈડલાઇન મુજબ ધાર્મિક સ્થાનોને પુન: ખોલવાની સંમતિ આપવામાં આવી છે. આ અનુસંધાને મંદિરના ટ્રસ્ટીઓ દ્વારા દર્શનાર્થીઓ માટે શ્રીહરિમંદિર ખોલવાનો નિર્ણય લેવામાં આવેલ છે. દર્શનાર્થીઓ માટેનો સમય સવારથી ૭:૩૦ થી બપોરે ૧:૦૦ સુધી અને સાંજે ૪:૩૦ થી ૬:૩૦ સુધી રહેશે.

આંબા મનોરથ
તા.૨૧/૦૬/૨૦૨૧, સોમવારના રોજ દર્શનાર્થીઓ માટે શ્રીહરિમંદિર ફરીથી ઉદ્ઘાટિત થઈ રહ્યું છે ત્યારે એ સાથે-સાથે પ્રતિવર્ષ અનુસાર આ વર્ષે પણ નિર્જળા એકાદશીના પરમ પાવન દિવસે પૂજ્ય ભાઇશ્રી રમેશભાઈ ઓઝાની ઉપસ્થિતિમાં શ્રીહરિ મંદિરમાં આંબા મનોરથ ઉત્સવ દર્શન થશે. જેના દર્શનનો સમય સવારથી ૭:૩૦ થી બપોરે ૧:૦૦ સુધી અને સાંજે ૪:૩૦ થી ૬:૩૦ સુધી રહેશે. તેમજ બપોરે ૧૨:૩૦ વાગ્યે ઉત્સવ આરતી સંપન્ન થશે.

આપ સૌ દર્શનાર્થીઓને સરકારશ્રીની કોવિડ ગાઈડલાઇન અને નિયમોના પાલન સાથે મનોરથના દર્શન કરવાનું જણાવવામાં આવે છે.